శ్రీకాళహస్తీశ్వర శతకము - ధూర్జటి

విషయ సూచిక : అ  ఆ  ఇ  ఈ  ఉ  ఊ  ఋ  ౠ  ఎ  ఏ  ఐ  ఒ  ఓ  ఔ  అం  అః  క  ఖ  గ  ఘ  ఙ  చ  ఛ  జ  ఝ  ఞ  ట  ఠ  డ  ఢ  ణ  త  థ  ద  ధ  న  ప  ఫ  బ  భ  మ  య  ర  ల  వ  శ  ష  స  హ  ళ  క్ష  ఱ 

అ (6)     Add New Padyam      

---

• "అమ్మా, యయ్య" యటంచునెవ్వరిని నేనన్నన్శివా ! నిన్ను నే
  సుమ్మీ నీ మదిఁ దల్లిదండ్రులనటంచు న్జూడఁగాఁబోకు నా
  కిమ్మైఁ దల్లియు దండ్రియున్ గురుఁడు నీవేకాన సంసారపుం
  జిమ్మంజీకటిఁ గప్పినన్ గడుపు నన్ శ్రీకాళహస్తీశ్వరా !  - Added By Dsubrahmanyam
  
  
• అకలంకస్థితి నిల్పి, నాదమను ఘంటారావమున్ బిందు దీ
  పకళాశ్రేణి వివేకసాధనములొప్పన్బూని యానంద తా
  రక దుర్గాటవిలో మనోమృగము గర్వస్ఫూర్తి వారించు వా
  రికిగా వీడు భవోగ్రబంధలతికల్ శ్రీకాళహస్తీశ్వరా !!  - Added By Dsubrahmanyam
  
  
• అడుగంబోనిక నన్యమార్గరతులం బ్రాణావనోత్సాహినై
  యడుగంబోయినబోదు నీదుపదపద్మారాధక శ్రేణియు
  న్నెడకున్ నిన్ను భజింపగా గనియు నాకేలా పరాపేక్ష ? కో
  రెడిదింకేమి ? భవత్ప్రసాదమమె తగున్ శ్రీకాళహస్తీశ్వరా !!  - Added By Dsubrahmanyam
  
  
• అమరస్త్రీలరమించినన్ జెడదు మోహంబింతయున్, బ్రహ్మ ప
  ట్టము సిద్ధించిన నాసదీరదు, నిరూఢక్రోధమున్ సర్వలో
  కముల న్మ్రింగినమాన, దిందుగల సౌఖ్యంబొల్ల, నీసేవ చే
  సి మహాపాతక వారిరాశిఁ గడతున్ శ్రీకాళహస్తీశ్వరా !!  - Added By Dsubrahmanyam
  
  
• అయవారై చరియింపవచ్చు తన పాదాంభోజ తీర్ధంబులన్
  దయతో గొమ్మనవచ్చు సేవకుని నర్థప్రాణదేహాదుల
  న్నియు నా సొమ్మనవచ్చు గాని, నరుల న్నిందింప, నిన్నాత్మ ని
  ప్క్రియతన్ గానగరాదు పండితులకున్ శ్రీకాళహస్తీశ్వరా !!  - Added By Dsubrahmanyam
  
  
• అల యేకార్ణవ వేళ నీవు వటపత్రాకారమై యుండఁగా
  చెలువంబొప్పఁగ మాధవుండు గలిగెన్ జేరంగఁజోటంచుదా
  నెలమిం దామరతంపరై బ్రతికి నాఁడింతాకుపై నుండియే
  సిలుగుల్ పొందక నీ కతంబునగదా శ్రీకాళహస్తీశ్వరా !  - Added By Chary
  
  

ఆ (4)     Add New Padyam      

---

• ఆరావంబుదయించెఁ దారకముగా నాత్మాభ్రవీధి న్మహా
  కారోకారమకార యుక్తమగు నోంకారాభిధానంబు చె
  న్నారు న్విశ్వమనంగఁ దన్మహిమచే నా నాదబిందుల్సుఖ
  శ్రీ రంజిల్లఁ గడంగు, నీవదె సుమీ ! శ్రీకాళహస్తీశ్వరా !!  - Added By Dsubrahmanyam
  
  
• ఆలంచు న్మెడగట్టి, దానికి సపత్యశ్రేణి కల్పించి, త
  ద్బాలవ్రాతమునిచ్చి పుచ్చుకొను సంబంధంబుగావించి యా
  మాలర్కంబున బాంధవంబనెడి ప్రేమం గొందరం ద్రిప్పగా,
  సీలన్సీల నమర్చినట్లొసగితో శ్రీకాళహస్తీశ్వరా !!  - Added By Dsubrahmanyam
  
  
• ఆలుంబిడ్డలు మిత్రులున్ హితులు నిష్టార్ధంబు లీనేర్తురే
  వేళ న్వారిభజింప జాలిపడ కావిర్భూత మోదంబునన్
  గాలం బెల్ల సుఖంబు నీకు, నిక భక్తశ్రేణి రక్షింప కే
  శ్రీ లెవ్వారికిఁ గూడఁబెట్టెదవయా ? శ్రీకాళహస్తీశ్వరా !!  - Added By Dsubrahmanyam
  
  
• ఆలున్ బిడ్డలు తల్లిదండ్రులు ధనంబంచు న్మహాభందనం
  బేలా నామెడఁ గట్టినాఁడవిఁక నిన్నే వేళఁ జింతింతు, ని
  ర్మూలంబైన మనంబులోనఁ గడుదుర్మోహాబ్ధిలోఁ గ్రుంకి యీ
  సీలామాలపుఁ జింతనెట్లుడిపెదో శ్రీకాళహస్తీశ్వరా !  - Added By Dsubrahmanyam
  
  

ఇ (0)     Add New Padyam      

---

ఈ (0)     Add New Padyam      

---

ఉ (0)     Add New Padyam      

---

ఊ (2)     Add New Padyam      

---

• ఊరూరం జనులెల్ల భిక్షమిడరో, యుండం గుహల్గల్గవో
  చీరానీకము వీధులం దొరకదో, శీతామృత స్వచ్ఛవాః
  పూరం బేరులఁ బారదో తపసులం బ్రోవంగ నీవోపవో
  చేరం బోవుదురేల రాజుల జనుల్ శ్రీకాళహస్తీశ్వరా !!  - Added By Dsubrahmanyam
  
  
• ఊరూరన్ బవినీని కాండ్లు కవులై యొక్కొక్కచోఁ గొందఱన్
  కేరే మీరును బాణకాదురనుచున్ గీతాలు బోధింపఁగా
  సారాసారమెఱుంగలేక మిగులంజౌకయ్యెగా పద్యముల్
  జేరంజోటికనేది సత్కవులకున్ శ్రీకాళహస్తీశ్వరా !  - Added By Chary
  
  

ఋ (0)     Add New Padyam      

---

ౠ (0)     Add New Padyam      

---

ఎ (1)     Add New Padyam      

---

• ఎన్నేళ్ళుండుదు? నేమిగందు? నిక నేనెవ్వారి రక్షించెదన్?
  నిన్నే నిష్ఠ భజించెద న్నిరుపమోన్నిద్రప్రమోదంబు నా
  కెన్నండబ్బెడు నెంతకాలమిక నేనిట్లున్న నన్నీయెడం?
  చిన్నంబుచ్చక నన్ను నేలుకొనవే ! శ్రీకాళహస్తీశ్వరా !!  - Added By Dsubrahmanyam
  
  

ఏ (2)     Add New Padyam      

---

• ఏ లీలన్నుతియింప వచ్చు నుపమోత్ప్రేక్షాధ్వనివ్యంగ్య శ
  బ్దాలంకార విశేషభాషల కలభ్యంబైన నీ రూపముం
  చాలుంజాలుఁ గవిత్వము న్నిలుచునే సత్యంబు వర్ణించుచో
  ఛీ ! లజ్జింపరు గాక మాదృశకవుల్ శ్రీకాళహస్తీశ్వరా !!  - Added By Dsubrahmanyam
  
  
• ఏ వేదంబు పఠించె లూత, భుజగంబే శాస్త్రముల్చూచె దా
  నే విద్యాభ్యసనం బొనర్చెగరి, చెంచే మంత్రమూహించె, భో
  దావిర్భావనిధానముల్ చదువులయ్యా ? కావు! మీపాద సం
  సేవాసక్తియె కాక జంతుతతికిన్ శ్రీకాళహస్తీశ్వరా !!  - Added By Dsubrahmanyam
  
  

ఐ (0)     Add New Padyam      

---

ఒ (3)     Add New Padyam      

---

• ఒక పూటించుక కూడు తక్కువగునే నోర్వంగలే, డెండకో
  పక నీడన్వెదకుం, జలిం జడిసి కుంపట్లెత్తుకోఁ జూచు, వా
  నకు నిళ్ళిళ్ళును దూరు, నీ తనువు దీనన్వచ్చు సౌఖ్యంబు రో
  సి కడాసింపరుగాక మర్త్యులకటా ! శ్రీకాళహస్తీశ్వరా !!  - Added By Dsubrahmanyam
  
  
• ఒకయర్థంబును నిన్ను నే నడుగఁగా నూహింప నెట్లైన బొ
  మ్ము కవిత్వంబులు నాకు జెందవని యేమోయంటివా నాదు జి
  హ్వకు నైసర్గిక కృత్యమింతయు సుమీ ప్రార్థించుటే కాదు కో
  రికల న్నిన్నును గాన నాకు వశమా శ్రీకాళహస్తీశ్వరా !  - Added By Chary
  
  
• ఒకరింజంపి పదస్థులై బ్రతుక తామొక్కొక్కరూహింతురే
  లొకొ ? తామెన్నడు జావరో ? తమకు బోవోసంపదల్ ? పుత్ర మి
  త్ర కళత్రాదులతోడ నిత్యసుఖమందంగందురో ? యున్నవా
  రికి లేదో మృతి యెన్నడుం గటకటా ! శ్రీకాళహస్తీశ్వరా !!  - Added By Dsubrahmanyam
  
  

ఓ (0)     Add New Padyam      

---

ఔ (0)     Add New Padyam      

---

అం (2)     Add New Padyam      

---

• అంతా సంశయమే శరీర ఘటనంబంతా విచారంబె లో
  నంతా దుఃఖపరంపర్వాన్వితమె, మేనంతా భయభ్రాంతమే
  యంతానాంత శరీర శోషణమె దుర్వ్యాపారమే దేహికిన్
  చింతన్నిన్నుదలంచి పొందరు నరుల్ శ్రీకాళహస్తీశ్వరా !!  - Added By Dsubrahmanyam
  
  
• అంతామిథ్య తలంచిచూచిన నరుండట్లౌ టెరింగిన్ సదా
  కాంతల్పుత్రులు నర్ధముల్ తనువు నిక్కంబంచు మోహార్ణవ
  భ్రాంతింజెంది చరించుగాని, పరమార్థంబైన నీయందుఁ దాఁ
  జింతాకంతయుఁ జింతనిల్పడు గదా శ్రీకాళహస్తీశ్వరా !  - Added By Dsubrahmanyam
  
  

అః (0)     Add New Padyam      

---

క (8)     Add New Padyam      

---

• కరి దైత్యున్బొరిగొన్న శూలము కరగ్రస్తంబుగాదో , రతీ
  శ్వరునిన్ కాల్చిన ఫాలలోచన శిఖావర్గంబు చల్లారెనో
  పరనిందా పరులన్వధింప విదియున్ భావ్యంబె ? వారేమి చే
  సిరి నీకున్బరమోపకార మరయన్ శ్రీకాళహస్తీశ్వరా !  - Added By Rajeshwari93
  
  
• కలధౌతాద్రియు నస్థిమాలికయు, గోగంధర్వమున్బున్కయుం
  బులితోలున్బసితంబు, బాపతొడవుల్పోకుండ, దోబుట్లకై
  తొలినేవారల తోడబుట్టగ గళాదుల్గల్గె మేలయ్యె నా
  సిలవుల్దూరము చేసి కొంటెరిగియే శ్రీకాళహస్తీశ్వరా !!  - Added By Dsubrahmanyam
  
  
• కలలంచు న్శకునంబులంచు గ్రహయోగంబంచు సాముద్రికం
  బులటంచుం దెవులంచు, దిష్టియనుచు న్భూతంబులంచు న్విషా
  దులటంచు న్నిమిషార్ధ జీవనములందుం బ్రీతిఁ బుట్టించి నా
  సిలుగుల్ ప్రాణులకెన్ని చేసితివయా ! శ్రీకాళహస్తీశ్వరా !!  - Added By Dsubrahmanyam
  
  
• కాయల్గాచె వధూనఖాగ్రములచే గాయంబు, వక్షోజముల్
  రాయన్రాపడె ఱొమ్ము, మన్మథ విహారక్లేశ విభ్రాంతిచే
  ప్రాయంబాయెను, బట్టగట్టె తల, చెప్పన్ రోత సంసారమే
  జేయంజాల, విరక్తు జేయగదవే, శ్రీకాళహస్తీశ్వరా !!  - Added By Dsubrahmanyam
  
  
• కాలద్వార కవాటబంధనము, దుష్కాల ప్రమాణక్రియా
  లీలాచాలక చిత్రగుప్త ముఖవల్మీకోగ్ర జిహ్వాద్భుత
  వ్యాళ వ్యాళవిరోధి, మృత్యుముఖదంష్ట్రాహార్య వజ్రంబు ది
  క్చేలాలంకృత ! నీదు నామ మరయన్ శ్రీకాళహస్తీశ్వరా !!  - Added By Dsubrahmanyam
  
  
• కాసంతైన సుఖంబొనర్చునొ, మనఃకామంబు లీడేర్చునో
  వీసంబైనను వెంటవచ్చునొ జగద్విఖ్యాతి గావించునో
  దోసంబు ల్వెడబాపునో, వలసినం దోడ్తో మిముం జూపునో
  ఛీ! సంసారదురాశలేలుడుపవో ! శ్రీకాళహస్తీశ్వరా !!  - Added By Dsubrahmanyam
  
  
• కేదారాది సమస్త తీర్థములు కోర్కింజూడ బోనేటికిన్
  గాదాముంగిలి వారణాసి కడుపే కైలాసశైలంబు నీ
  పాదధ్యానము సంభవించునపుడే భావింప నజ్ఞాన ల
  క్ష్మీదారిద్ర్యులుగారె లోకు లకటా ! శ్రీకాళహస్తీశ్వరా !!  - Added By Dsubrahmanyam
  
  
• కొడుకుల్ పుట్టరటంచునేడ్తు రవివేకుల్ జీవనభ్రాంతులై
  కొడుకుల్ పుట్టరె కౌరవేంద్రున కనేకుల్ ? వారిచే నే గతుల్
  వడసెం ? పుత్రులు లేని యా శుకునకున్ వాటిల్లెనే దుర్గతుల్
  చెడునే మోక్షపదం బపుత్రునకున్ శ్రీకాళహస్తీశ్వరా !  - Added By Dsubrahmanyam
  
  

ఖ (0)     Add New Padyam      

---

గ (2)     Add New Padyam      

---

• గతినీవంచు భజించువార లపవర్గంబొందఁగానేల సం
  తతముం గూటికినై చరింప వినలేదా "యాయురన్నం ప్రయ
  చ్ఛతి" యంచున్మొఱవెట్టఁగా శ్రుతులు సంసారాంధకారాభిదూ
  శిత దుర్మార్గులు గానఁ గానఁబడవో శ్రీకాళహస్తీశ్వరా !  - Added By Chary
  
  
• గ్రహదోషంబులు దుర్నిమిత్తములు నీ కల్యాణనామంబు ప్ర
  త్యహమున్ బేర్కొను నుత్తమోత్తముల బాధంబెట్టగానోవునే
  దహనుంగప్పగ జాలునే శలభ సంతానంబు ? నీ సేవచే
  సి హతక్లేశులు గారుగాక మనుజుల్ ! శ్రీకాళహస్తీశ్వరా !!  - Added By Dsubrahmanyam
  
  

ఘ (1)     Add New Padyam      

---

• ఘడియల్ రెంటికొ మూటిఁకో ఘడియకో కాదేని నేఁడెల్లియో
  కడనేఁడాదికొ యెన్నడో యెరుఁగ మీ కాయంబు లీ భూమిపైఁ
  బడఁగానున్నవి, ధర్మమార్గమొక్కటిం బాటింపరీ మానవుల్
  చెడుగుల్ నీ పదభక్తియుం దెలియరో శ్రీకాళహస్తీశ్వరా !!  - Added By Dsubrahmanyam
  
  

ఙ (0)     Add New Padyam      

---

చ (5)     Add New Padyam      

---

• చదువుల్నేర్చిన పండితాధములు స్వేచ్ఛాభాషణక్రీడలన్
  వదరన్, సంశయ భీకరాటవుల త్రోవల్దప్పి వర్తింపగా
  మదనక్రోధ కిరాతులందు గని భీమప్రౌఢిచే దాకినం
  చెదురుంజిత్తము, చిత్తగింపగదవే శ్రీకాళహస్తీశ్వరా !!  - Added By Dsubrahmanyam
  
  
• చనువారిం గని యేడ్చువారు జముడా ! సత్యంబుగావత్తు మే
  మనుమానం బికలేదు నమ్మమని తారావేళ నా రేవునన్
  మునుగంబోవుచు బాసచేయుటసుమీ ముమ్మాటికింజూడగా
  జెనటుల్గానరు దీని భావమిదివో శ్రీకాళహస్తీశ్వరా !!  - Added By Chary
  
  
• చవిగాఁజూడ వినంగ మూర్కొనఁ దనూసంఘర్షణాస్వాద మొం
  ద వినిర్మించెదవేల జంతువుల నేతత్క్రీడలే పాతక
  వ్యవహారంబులు సేయనేమిటికి మాయావిద్యచేఁ బ్రొద్దుపు
  చ్చి వినోదింపగఁ దీన నేమిఫలమో శ్రీకాళహస్తీశ్వరా !  - Added By Chary
  
  
• చావంగాలము చేరువౌ టెరింగియుం చాలింపగాలేక, త
  న్నేవైద్యుండు చికిత్సఁ బ్రోవగలడో ? యేమందు రక్షించునో ?
  ఏవేల్పుల్ కృపఁ జూతురో ? యనుచు, నిన్నింతైన చింతింపఁ డా
  జీవచ్ఛ్రాద్ధము చేసికొన్న యతియున్ శ్రీకాళహస్తీశ్వరా !!  - Added By Dsubrahmanyam
  
  
• చెడుగుల్ కొందరు గూడి చేయఁగఁ బనుల్ చీకట్ల దూరంగ బా
  ల్పడితింగాని చరింపరాని నిను నొల్లంజాలుఁ బొమ్మంచు ని
  ల్వెడలం ద్రోచినఁ జూరుపట్టుకొని నే వ్రేలాడుదుం గోర్కెఁ, గో
  రెడి యర్థంబులు నాకు నేల యిడవో శ్రీకాళహస్తీశ్వరా !!  - Added By Dsubrahmanyam
  
  

ఛ (0)     Add New Padyam      

---

జ (4)     Add New Padyam      

---

• జలకంబుల్, రసముల్, ప్రసూనములు వాచాబంధముల్వాద్యము
  ల్కల శబ్దధ్వను లంచితాంబర మలంకారంబు, దీప్తుల్మెరుం
  గులు, నైవేద్యము మాధురీమహిమగాఁగొల్తున్నినున్ భక్తిరం
  జిల దివ్యార్చన గూర్చి నేర్చిన క్రియన్ శ్రీకాళహస్తీశ్వరా !!  - Added By Dsubrahmanyam
  
  
• జలజశ్రీ గల మంచినీళ్ళు గలవా ? చట్రాతిలో బాపురే !
  వెలి వాడన్మఱి బాఁపనిల్లు గలదా ? వేసాలు గా కక్కటా !
  నలి నా రెండు గుణంబులెంచి మదిలో నన్నేమి రోయంగ నీ
  చెలువంబైన గుణంబు లెంచుకొనవే శ్రీకాళహస్తీశ్వరా !  - Added By Chary
  
  
• జాతుల్సెప్పుట, సేవచేయుట, మృషల్ సంధించు టన్యాయవి
  ఖ్యాతిం బొందుట, కొండెగాడవుట, హింసారంభకుండౌట, మి
  థ్యాతాత్పర్యములాడుటన్నియుఁ బరద్రవ్యంబు నాశించి, యీ
  శ్రీ తానెన్ని యుగంబు లుండగలదో శ్రీకాళహస్తీశ్వరా !!  - Added By Dsubrahmanyam
  
  
• జ్ఞాతుల్ ద్రోహులు వాండ్రుసేయు కపటేర్ష్యాది క్రియాదోషముల్
  మాతండ్రాన సహింపరాదు, ప్రతికర్మంబించుకే జేయగా
  బోతే దోషముగాన మాని, యతినై పోగోరినన్ సర్వదా
  చేతః క్రోధము మానదెట్లు నడుతున్ శ్రీకాళహస్తీశ్వరా !!  - Added By Chary
  
  

ఝ (0)     Add New Padyam      

---

ఞ (0)     Add New Padyam      

---

ట (0)     Add New Padyam      

---

ఠ (0)     Add New Padyam      

---

డ (0)     Add New Padyam      

---

ఢ (0)     Add New Padyam      

---

ణ (0)     Add New Padyam      

---

త (8)     Add New Padyam      

---

• తనయుంగాంచి, ధనంబునించి, దివిజస్థానంబు గట్టించి, వి
  ప్రున కుద్వాహము చేసి, సత్కృతికి పాత్రుండై, తటాకంబుఁ నే
  ర్పున ద్రవ్వించి, వనంబువెట్టి, మననీ, పోలేడు నీ సేవ జే
  సిన పుణ్యాత్ముడు పోవు లోకమునకున్ శ్రీకాళహస్తీశ్వరా !!  - Added By Dsubrahmanyam
  
  
• తను వెందాక ధరిత్రినుండు ననునందాక న్మహారోగ దీ
  పన దుఃఖాదుల బొందకుండ ననుకంపాదృష్టి వీక్షించి యా
  వెనుక న్నీ పద పద్మముల్దలచుచు న్విశ్వప్రపంచంబు బా
  సిన చిత్తంబున నుండచేయ గదవే శ్రీకాళహస్తీశ్వరా !!  - Added By Dsubrahmanyam
  
  
• తనువే నిత్యముగానొనర్పు మదిలేదా, చచ్చి, జన్మింపకుం
  డ నుపాయంబు ఘటింపు, మీ గతులరెంటన్నేర్పులేకున్న లే
  దని నాకిప్పుడె చెప్పు; చేయగల కార్యంబున్న సంసేవ జే
  సి నినుంగాంచెదగాక కాలముననో శ్రీకాళహస్తీశ్వరా !!  - Added By Dsubrahmanyam
  
  
• తమ నేత్రద్యుతిఁ దామెచూడ సుఖమై తాదాత్త్యమున్గూర్పఁగా
  విమలమ్ముల్కడు లాభము ల్జిత లసద్విద్యుల్లతా లాస్యముల్
  సుమనోబాణ జయప్రదమ్ము లనుచున్ చూచున్ జనంబూని హా
  రిమృగాక్షీనివహమ్ము కన్నుఁగవలన్ శ్రీకాళహస్తీశ్వరా !!  - Added By Dsubrahmanyam
  
  
• తమకంబొప్పఁ బరాంగనాజన పరద్రవ్యంబులన్ మ్రుచ్చిలం
  గ మహోద్యోగముసేయు నెమ్మనము దొంగంబట్టి వైరాగ్య పా
  శములంజుట్టి బిగించి నీదు చరణస్తంభంబునం గట్టివై
  చి ముదంబెప్పుడు గల్గజేయగదవో శ్రీకాళహస్తీశ్వరా !!  - Added By Dsubrahmanyam
  
  
• తరగల్ పిప్పలపత్రముల్ మెరుగుటద్దంబుల్ మరుద్దీపముల్
  కరికర్ణాంతము లెండమావులతతుల్ ఖద్యోతకీటప్రభల్
  సురవీధీలిఖితాక్షరంబు లసువుల్ జ్యోత్స్నాపయఃపిండముల్
  సిరులందేల మదాంధులౌదురు జనుల్ ! శ్రీకాళహస్తీశ్వరా !!  - Added By Dsubrahmanyam
  
  
• తలమీదం గుసుమప్రసాద మలిక స్థానంబుపై భూతియున్
  గళసీమంబున దండ నాసికతుద న్గంధప్రసారంబు లో
  పల నైవేద్యము జేర్చునే మనుజు డా భక్తుండు నీకెప్పుడుం
  జెలికాడై విహరించు రౌష్యగిరిపై శ్రీకాళహస్తీశ్వరా !!  - Added By Dsubrahmanyam
  
  
• తాతల్ తల్లియుఁ దండ్రియున్ మరియు బెద్దల్చావగా చూడరో
  భీతిం బొందఁగ నేల చావునకుఁగాఁ, బెండ్లాము బిడ్డల్హిత
  వ్రాతంబుల్తిలకింప జంతువులకు న్వాలాయమై యుండఁగాఁ
  జేతోవీధి నరుండు నిన్గొలువఁడో శ్రీకాళహస్తీశ్వరా !!  - Added By Dsubrahmanyam
  
  

థ (0)     Add New Padyam      

---

ద (7)     Add New Padyam      

---

• దంతంబుల్పడనప్పుడే తనువునం దార్ఢ్యంబు నున్నప్పుడే
  కాంతాసంఘము రోయనప్పుడె, జరాక్రాంతంబు గానప్పుడే
  వింతల్మేనఁ జరించనప్పుడె కురుల్వెల్వెల్ల గానప్పుడే
  చింతింపన్వలె నీ పదాంబుజములన్ శ్రీకాళహస్తీశ్వరా !!  - Added By Dsubrahmanyam
  
  
• దయఁజూడుండని గొందరాడుదురు నిత్యంబున్నినుం గొల్చుచున్
  నియమంబెంతొ ఫలంబునంతియగదా ? నీవీయ పిండెంతొ యం
  తియకా నెప్పటికిం దళం బశనబుద్ధిం జూడ నేలబ్బు న
  త్క్రియలన్నిన్ను భజింప కిష్టసుఖముల్ శ్రీకాళహస్తీశ్వరా !!  - Added By Dsubrahmanyam
  
  
• దినముం జిత్తములో సువర్ణముఖరీతీరప్రదేశామ్ర కా
  నన, మధ్యోపలవేదికాగ్రమున నానందంబునం పంకజా
  సన నిష్ఠన్నిను జూడగన్న నదివో సౌఖ్యంబు లక్ష్మీవిలా
  సిని మాయనటనల్ సుఖంబులగునే శ్రీకాళహస్తీశ్వరా !!  - Added By Dsubrahmanyam
  
  
• దివిజక్ష్మారుహ ధేను రత్నఘనభూతిన్ ప్రస్ఫురద్రత్నసా
  నువు నీవిల్లు, నిధీశ్వరుండుసఖు, డర్ణోరాశి కన్యావిభుం
  డు విశేషార్చకుఁ డింక నీ కెన ఘనుండున్ గల్గునే ? నీవు చూ
  చి విచారింపవు లేమి యెవ్వడుడుపున్ శ్రీకాళహస్తీశ్వరా !  - Added By Dsubrahmanyam
  
  
• దురము న్దుర్గము రాయబారము మరిన్దొంగర్కము న్త్వెద్యమున్
  నరనాథాశ్రయ మోడబేరమును బెన్మంత్రంము సిద్ధించినన్
  అరయన్ దొడ్డఫలంబు గల్గు నదిగాకా కార్యమే తప్పినన్
  సిరియుంబోవును బ్రాణహానియు నగున్ శ్రీకాళహస్తీశ్వరా !!  - Added By Dsubrahmanyam
  
  
• దొప్పెండెంగిలి దెచ్చియిచ్చినను గండూషాంబుధారావళిన్
  దొప్పం దోఁగిన చెప్పుగాల తలపై ద్రొక్కంగ నట్లైనఁ గ
  న్నప్పం బాత్రుని జేసితింతటికి సన్మానంబు దీపింపఁగా
  చెప్పన్నేరము నీ విహార మహిమల్ శ్రీకాళహస్తీశ్వరా !  - Added By Chary
  
  
• ద్వారద్వారములందుఁ గంచుకిజన వ్రాతంబు దండంబులన్
  దోరంతస్స్థలి బగ్గనంబొడుచుచున్ దుర్భాషలాడన్ మఱిన్
  వారింభ్రార్థనచేసి రాజులకు సేవల్సేయగాఁ బోరు ల
  క్ష్మీ రాజ్యంబును గోరి నీ పరిజనుల్ శ్రీకాళహస్తీశ్వరా !  - Added By Chary
  
  

ధ (0)     Add New Padyam      

---

న (18)     Add New Padyam      

---

• నిచ్చల్ నిన్ను భజించి చిన్మయ మహానిర్వాణపీఠంబు పై
  రచ్చల్సేయక, యార్జవంబు కుజనవ్రాతంబుచేగ్రాగి, భూ
  భృచ్చండాలుర గొల్చి వారు దనుగోపింపన్ బుధుం డార్తుడై
  చిచ్చారం జమురెల్ల జల్లుకొనునో శ్రీకాళహస్తీశ్వరా !!  - Added By Dsubrahmanyam
  
  
• నిను నా వాకిలి గావుమంటినొ ? మరున్నీ లాలకభ్రాంతి గుం
  టెన పొమ్మంటినొ ? యెంగిలిచ్చితిను తింటేగాని కాదంటినో ?
  నిను నెమ్మిందగ విశ్వసించు సుజనానీకంబు రక్షింప చే
  సిన నా విన్నపమేల గైకొనవయా ? శ్రీకాళహస్తీశ్వరా !!  - Added By Dsubrahmanyam
  
  
• నిను నిందించిన దక్షుపైఁ దెగవొ, వాణీనాథు శాసింపవో,
  చనువా నీ పదపద్మ సేవకులఁ దుచ్ఛంబాడు దుర్మార్గులం
  బెనుప న్నీకును నీఁదు భక్తతతికిన్ భేదంబు గానంగ వ
  చ్చెనొ, లేకుండిన నూరకుండగలవా ? శ్రీకాళహస్తీశ్వరా !!  - Added By Dsubrahmanyam
  
  
• నిను సేవింపగ నాపదల్పొడమనీ, నిత్యోత్సవం బబ్బనీ
  జనమాత్రుండననీ, మహాత్ముడననీ, సంసారమోహంబు పై
  కొననీ జ్ఞానముగల్గనీ, గ్రహగతుల్ కుందింపనీ, మేలు వ
  చ్చిన రానీ, యవి నాకు భూషణములో శ్రీకాళహస్తీశ్వరా !!  - Added By Dsubrahmanyam
  
  
• నిన్నం జూడరొ మొన్నఁజూడరొ జనుల్ నిత్యంబుఁజావంగ నా
  పన్నుల్గన్న నిధానమయ్యెడి ధనభ్రాంతి న్విసర్జింపలే
  కున్నా రెన్నఁడు నిన్ను గందురిక మర్త్యుల్ గొల్వరేమో నిను
  న్చిన్నంబుచ్చక ప్రోవకుండునెడలన్ శ్రీకాళహస్తీశ్వరా !  - Added By Chary
  
  
• నిన్ను న్నమ్మినరీతి నమ్మనొరులన్ నీకన్ననా కెన్న లే
  రన్నల్దమ్ములు తల్లిదండ్రులు గురుం డాపత్సహాయుండు నా
  యన్నా ! యెన్నడు నన్ను సంస్కృతి విషాదాంభోది దాటించి య
  చ్ఛిన్నానంద సుఖాబ్ధిదేల్చేదొ కదే ! శ్రీకాళహస్తీశ్వరా !!  - Added By Dsubrahmanyam
  
  
• నిన్నేరూపముగా భజింతుమదిలో, నీ రూపుమోఁకాలొ, స్త్రీ
  చన్నో, కుంచమొ, మేకపెంటికయొ ? యీ సందేహముల్మాన్పి, నా
  కన్నారన్భవదీయమూర్తి సగుణాకారంబుగాఁ జూపవే
  చిన్నీ రేజ విహారమత్త మధుపా ! శ్రీకాళహస్తీశ్వరా !!  - Added By Dsubrahmanyam
  
  
• నిప్పై పాతక దూలశైలమడచున్ నీనామము న్మానవుల్
  తప్పన్ దవ్వుల విన్న నంతకభుజాదర్పోద్ధత క్లేశముల్
  తప్పుందారును ముక్తులౌదురని శాస్త్రంబు ల్మహాపండితుల్
  చెప్పంగాఁ దమ కింక శంకవలెనా ? శ్రీకాళహస్తీశ్వరా !  - Added By Dsubrahmanyam
  
  
• నీ కారుణ్యము గల్గినట్టి నరుడే నీచాలయంబుం జొరం
  డే కార్పణ్యపు మాటలాడ నరుగం డెవ్వారితో వేషముల్
  గైకోడే మతముల్భజింప డిల నే కష్టప్రకారంబులన్
  చీకాకై చెడిపోడు జీవనదశన్ శ్రీకాళహస్తీశ్వరా !!  - Added By Dsubrahmanyam
  
  
• నీ పంచం బడియుండగా కలిగిన న్భిక్షాన్నమే చాలు, ని
  క్షేపం బబ్బిన రాజకీయముల నే సేవింపగా నోప, నా
  శాపాశంబుల జుట్టి త్రిప్పకుము సంసారార్ధమై, బంటుగా
  చేపట్టం దయగల్గెనేని మదిలో శ్రీకాళహస్తీశ్వరా !!  - Added By Dsubrahmanyam
  
  
• నీ పేరున్, భవధంఘ్రి తీర్ధము భవన్నిష్ఠ్యూత తాంబూలముల్
  నీ పళ్ళెంబు ప్రసాదమున్ గొనికదా నే బిడ్డడైనాడ న
  న్నీ పాటిం గరుణింపు మోప నిక నే నెవ్వారికిం బిడ్డగాన్
  చేపట్టందగు పట్టి మానఁదగదో శ్రీకాళహస్తీశ్వరా !!  - Added By Dsubrahmanyam
  
  
• నీ భక్తు ల్పదివేల భంగుల నినున్సేవింపుచున్ వేడగా
  లోభం బేటికి వారికోర్కులు కృపాళుత్వంబునం దీర్పరా
  దా ! భవ్యంబు దలంచి చూడు పరమార్థంబిచ్చి పొమ్మన్న నీ
  శ్రీ భాండారములో గొఱంత పడునా ? శ్రీకాళహస్తీశ్వరా !!  - Added By Dsubrahmanyam
  
  
• నీ రూపంబు దలంపగా తుదమొద ల్నేగాన నీవైననున్
  రారా! రమ్మనియంచు చెప్పవు, వృథారంభంబు లింకేటికిన్
  నీరన్ముంపుము, పాలముంపు మిక నిన్నే నమ్మినాడన్ జుమీ
  శ్రీరామార్చిత పాదపద్మ యుగళా ! శ్రీకాళహస్తీశ్వరా !!  - Added By Dsubrahmanyam
  
  
• నీకుం గాని కవిత్వమెవ్వరికి నే నీనంచు మీదెత్తితిన్
  జేకొంటిన్ బిరుదంబు, కంకణము ముంజేగట్టితిం, బట్టితిన్
  లోకుల్ మెచ్చ వ్రతంబు, నా తనువుకీలున్ నేర్పులుం గావు, ఛీ
  ఛీ ! కాలంబులరీతి దప్పెడుజుమీ శ్రీకాళహస్తీశ్వరా !!  - Added By Dsubrahmanyam
  
  
• నీకున్ మాంసము వాంఛయేని కరువా? నీ చేతలేడుండగా
  జోకైనట్టి కుఠారముండ ననలజ్యోతుండ నీరుండగా
  పాకం బొప్ప ఘటించి చేతిపునుకన్ భక్షింప కా బోయచే
  చేకొంటెంగిలి మాంస మిట్లు తగునా ? శ్రీకాళహస్తీశ్వరా !!  - Added By Dsubrahmanyam
  
  
• నీతో యుద్ధముఁ చేయనోప, గవితానిర్మాణ శక్తిన్నిన్నున్
  బ్రీతుం చేయఁగలేను, నీ కొరకుఁ తండ్రిన్ జంపగాజాల నా
  చేతన్ రోకట నిన్ను మొత్త వెరతున్ ; జీకాకు నా భక్తి యే
  రీతి న్నాకిఁక నిన్ను చూడగనగున్ శ్రీకాళహస్తీశ్వరా !  - Added By Dsubrahmanyam
  
  
• నీనా యం దొడబాటుమాట వినుమా ! నీచేత జీతంబునేఁ
  గానింబట్టక, సంతతంబు మదివేడ్కన్ గొల్తు, సంతస్సప
  త్నానీకంబున కొప్పగింపకుము నన్నాపాటియేచాలు, తే
  జీనొల్లం గరినొల్ల నొల్లసిరులన్ శ్రీకాళహస్తీశ్వరా !!  - Added By Dsubrahmanyam
  
  
• నీపై గావ్యము చెప్పుచున్న యతడు న్నీ పద్యముల్ వ్రాసి యి
  మ్మా పాఠంబొనరింతు నన్నయతడున్ మంజుప్రబంధంబు ని
  ష్టాపూర్తిం బఠియించుచున్నయతడున్ సద్బాంధవుల్ గాక ఛీ
  ఛీ ! పృష్ఠాగత బాంధవంబు నిజమా ! శ్రీకాళహస్తీశ్వరా !!  - Added By Dsubrahmanyam
  
  

ప (8)     Add New Padyam      

---

• పటవద్రజ్జుభుజంగవద్రజత విభ్రాంతి స్ఫురచ్ఛుక్తి వ
  ద్ఘటవ చ్చంద్రశిలాజపాకుసుమ రుక్సాంగత్య వత్తంచు వా
  క్పటిమల్నేర్తురు చిత్సుఖంబనుభవింపన్ లేక దుర్మేధసుల్
  చిటుకన్నం దలపోయఁజూతురధముల్ శ్రీకాళహస్తీశ్వరా !  - Added By Chary
  
  
• పదివేలైనను లోకకంటకులచేఁ బ్రాప్తించు సౌఖ్యంబు నా
  మదికిం బథ్యముగాదు సర్వమునకున్ మధ్యస్థుఁడై సత్యదా
  న దయాదుల్గల రాజు నా కొసఁగు మెన్నన్వాని నీయట్ల చూ
  చి దినంబున్ముద మొందుదుం గడపటన్ శ్రీకాళహస్తీశ్వరా !  - Added By Chary
  
  
• పదునాల్గేలె మహాయుగంబులొక భూపాలుండు, చల్లించెన
  య్యుదయాస్తాచలసంధి నాజ్ఞ నొక డాయుష్మంతుడై వీరి య
  భ్యుదయంబెవ్వరు చెప్పగా వినరొ ? యల్పుల్మత్తులై యేల చ
  చ్చెదరో రాజులమంచు నక్కటకటా ! శ్రీకాళహస్తీశ్వరా !!  - Added By Dsubrahmanyam
  
  
• పరిశీలించితి మంత్రతంత్రములు చెప్పన్వింటి సాంఖ్యాది యో
  గరహస్యంబులు వేదశాస్త్రములు వక్కాణించితిన్ శంక వో
  దరయం గుమ్మడికాయలోను యవగింజంతైన నమ్మించి సు
  స్థిర విజ్ఞానము త్రోవఁ జూపగదవే శ్రీకాళహస్తీశ్వరా !!  - Added By Dsubrahmanyam
  
  
• పవమానాశన భూషణప్రకరము, ల్భద్రేభచర్మంబు, నా
  టకవిత్వంబు ప్రియంబులై, భుజగశుండాలాటవీచారులన్
  భవదుఃఖంబుల బాపుటొప్పుఁ చెలదిం బాటించి కైవల్య మి
  చ్చి వినోదించుట కేమి కారణమయా శ్రీకాళహస్తీశ్వరా !!  - Added By Dsubrahmanyam
  
  
• పవి పుష్పంబగు, నగ్నిమంచగు, నకూపారంబు భూమీస్థలం
  బవు, శత్రుండతిమిత్రుడౌ, విషముదివ్యాహారమౌనెన్నగా
  నవనీ మండలి లోపలన్ శివ శివేత్యాభాషణోల్లాసికిన్
  శివ ! నీ నామము సర్వవశ్యకరమౌ, శ్రీకాళహస్తీశ్వరా !!  - Added By Dsubrahmanyam
  
  
• పాలుం బువ్వయుఁబెట్టెదన్, గుడువరా పాపన్న, రా యన్న, లే
  లే లెమ్మన్న, నరంటి పండ్లు గొనితే, లేకున్ననే నొల్లనం
  టే, లాలింపరె తల్లి తండ్రులపు డట్టే తెచ్చి, వాత్సల్య ల
  క్ష్మీ లీలావచనంబులం గుడుపరా శ్రీకాళహస్తీశ్వరా !!  - Added By Dsubrahmanyam
  
  
• పుడమి న్నిన్నొక బిల్వపత్రమున నే పూజించి, పుణ్యంబునుం
  బడయన్నేరక పెక్కుదైవములకుం బప్పుల్ ప్రసాదంబులుం
  గుడుముల్దోసెలు సారెసత్తు లటుకుల్ గుగ్గిళ్ళనుం బెట్టుచుం
  జెడి, యెందుం కొరగాకపోదు రకటా ! శ్రీకాళహస్తీశ్వరా !!  - Added By Dsubrahmanyam
  
  

ఫ (0)     Add New Padyam      

---

బ (0)     Add New Padyam      

---

భ (3)     Add New Padyam      

---

• భవకేళీమదిరామదంబున మహాపాపాత్ముఁడై వీఁడు న
  న్ను వివేకింపఁడటంచు, నేను నరకార్ణోరాశిపాలైనఁ బ
  ట్టవు? బాలుండొకచోట నాటతమితోడ న్నూతఁ గూలంగఁ దం
  డ్రి విచారింపకయుండునా కటకటా ! శ్రీకాళహస్తీశ్వరా !  - Added By Dsubrahmanyam
  
  
• భవదుఃఖంబులు రాజకీటముల నేఁ బ్రార్ధించినన్ బాయునే ?
  భవదంఘ్రిస్తుతి చేతగాక, విలసద్బాలక్షుథాక్లేశ దు
  ష్ట విధుల్మానునె ? చూడ మేకమెడచంటం తల్లి కారుణ్య దృ
  ష్టి విశేషంబుననిచ్చుచంటవలెనో శ్రీకాళహస్తీశ్వరా !!  - Added By Dsubrahmanyam
  
  
• భసితోద్ధూళన ధూసరాంగులు జటాభారోత్తమాంగుల్ తపో
  వ్యసనుల్ సాధితపంచవర్ణరసనుల్ వైరాగ్యవంతుల్ నితాం
  తసుఖస్వాంతులు సత్యభాషణ సముద్యద్రత్నరుద్రాక్షరా
  జిసమేతుల్ తుదనెవ్వరైనఁ గొలుతున్ శ్రీకాళహస్తీశ్వరా !  - Added By Chary
  
  

మ (7)     Add New Padyam      

---

• మదమాతంగము లందలంబులు హరుల్మాణిక్యముల్పల్లకుల్
  ముదితల్ చిత్రదుకూలము ల్పరిమళంబు ల్మోక్షమీజాలునే
  మదిలో వీని నపేక్షజేసి నృపధామద్వార దేశంబు గాం
  చి దినంబుల్ వృథపుత్తురఙ్ఞు లకటా ! శ్రీకాళహస్తీశ్వరా !!  - Added By Dsubrahmanyam
  
  
• మల భూయిష్ట మనోజధామము సుషుమ్నాద్వారమో ! యారు కుం
  డలియో పాదకరాక్షియుగ్మములు షట్చక్రంబులో! మోముదా
  జలజంబో నిటలంబు చంద్రకళయో సంగంబు యోగంబొ ? గా
  సిలి సేవింతురు కాంతలన్ భువిజనుల్ శ్రీకాళహస్తీశ్వరా !!  - Added By Dsubrahmanyam
  
  
• మాయాజాండ కరండకోటి బొడిగా మర్ధించిరో విక్రమా
  జేయుం గాయజు చంపిరో, కపటలక్ష్మీ మోహముల్ బాసిరో,
  యాయుర్ధాయ భుజంగ మృత్యువు ననాయాసంబునన్ గెల్చిరో,
  శ్రేయోదాయకులౌదు రెట్టు లితరుల్ శ్రీకాళహస్తీశ్వరా !!  - Added By Dsubrahmanyam
  
  
• మును నీచే నపవర్గ రాజ్యపదవీమూర్ధాభిశేకంబు గాం
  చిన పుణ్యాత్ములు నేను నొక్కసరివో చింతించి చూడంగ నె
  ట్లనినం గీటఫణీంద్రపోతమదవేదండోగ్ర హింసావిచా
  రినిఁగాఁగా నినుఁగానఁగాక మదిలో శ్రీకాళహస్తీశ్వరా !  - Added By Chary
  
  
• మును నేఁ బుట్టిన పుట్టులెన్నిగలవో, మోహంబుచే నందుఁ జే
  సిన కర్మంబుల ప్రోవులెన్నిగలవో, చింతించినం గాని, యీ
  జననంబే యని యున్నవాడ నిదియే చాలింపవే నిన్ను గొ
  ల్చిన పుణ్యంబునకుం గృపారతుడవై శ్రీకాళహస్తీశ్వరా !!  - Added By Dsubrahmanyam
  
  
• మొదలన్ జేసినవారి ధర్మములు నిర్మూలంబుగాఁ చేసి దు
  ర్మదులై యిప్పుడు వారధర్మములొనర్పం, దమ్ము దైవంబు న
  వ్వదె ? రానున్న దురాత్ములెల్ల తమ త్రోవంబోవరే యేల చే
  సెదరో మీఁదు దలంచి చూడకధముల్ శ్రీకాళహస్తీశ్వరా !!  - Added By Dsubrahmanyam
  
  
• మొదలన్ భక్తులకిచ్చినాఁడవు గదా మోక్షంబు నేఁడేమయా
  ముదియంగా ముదియంగఁబుట్టె ఘనమౌ మోహంబు లోభంబున
  న్నది సత్యంబు కృపందలంప వొక పుణ్యాత్ముండు నిన్నాత్మ గొ
  ల్చి దినంబున్మొఱవెట్టఁగా గటకటా ! శ్రీకాళహస్తీశ్వరా !  - Added By Chary
  
  

య (0)     Add New Padyam      

---

ర (8)     Add New Padyam      

---

• రతిరాజుద్ధతి మీఱనొక్క మఱి గోరాజాశ్వునిన్ నొక్కఁబో
  నతఁడా దర్పకు వేగ నొత్తఁ గవయం బాఁబోతునుందాఁకి యు
  గ్రతఁ బోరాడఁగ నున్న యన్నడిమి లేఁగల్వోలె శోకానల
  స్థితిపాలై మొఱపెట్టినన్ మనుపవే శ్రీకాళహస్తీశ్వరా !  - Added By Chary
  
  
• రాజన్నంతనె పోవునా ? కృపయు, ధర్మం, బాభిజాత్యంబు, వి
  ద్యాజాతక్షమ, సత్యభాషణము, విద్వన్మిత్ర సంరక్షయున్,
  సౌజన్యంబు, కృతంబెఱుంగుటయు, విశ్వాసంబు గాకున్న దు
  ర్బీజశ్రేష్ఠులుగా గతంబుగలదే శ్రీకాళహస్తీశ్వరా !!  - Added By Chary
  
  
• రాజర్థాతురుడైనచో నెచట ధర్మంబుండు ? నేరీతి నా
  నాజాతి క్రియలేర్పడున్ ? సుఖము మాన్యశ్రేణికెట్లబ్బు ? రూ
  పాజీవాళికి నేది దిక్కు ? ధృతి నీ భక్తుల్ భవత్పాద నీ
  రేజంబుల్ భజియింతు రే తెరగునన్ ? శ్రీకాళహస్తీశ్వరా !!  - Added By Dsubrahmanyam
  
  
• రాజశ్రేణికి దాసులై సిరులఁ గోరం జేరఁగా సౌఖ్యమో
  యీ జన్మంబు తరింపఁజేయఁగల మిమ్మే ప్రొద్దు సేవించు ని
  ర్వ్యాజాచారము సౌఖ్యమో తెలియలేరో మానవు ల్బాపరా
  జీజాతాది మదాంధ బుద్ధులగుచున్ శ్రీకాళహస్తీశ్వరా !  - Added By Chary
  
  
• రాజుల్మత్తులు, వారి సేవ నరకప్రాయంబు, వారిచ్చు నం
  భోజాక్షీ చతురంతయాన తురగీ భూషాదు లాత్మవ్యథా
  బీజంబుల్, తదపేక్ష చాలు, పరితృప్తింబొందితిన్, జ్ఞానల
  క్ష్మీ జాగ్రత్పరిణామ మిమ్ము దయతో, శ్రీకాళహస్తీశ్వరా !!  - Added By Dsubrahmanyam
  
  
• రాజై దుష్కృతి చెందె చందురుడు, రారాజై కుబేరుండు దృ
  గ్రాజీవంబున గాంచె దుఃఖము కురుక్ష్మాపాలుడా మాటనే
  యాజింగూలె సమస్త బంధువులతో, నారాజ శబ్దంబు ఛీ,
  ఛీ ! జన్మాంతరమందు నొల్లనుజుమీ ! శ్రీకాళహస్తీశ్వరా !!  - Added By Dsubrahmanyam
  
  
• రోసిందేఁటిది రోఁతలేఁటిది మనోరోగస్థుఁడై దేహి తాఁ
  బూసిందేఁటిది పూఁతలేఁటివి మదాపూతంబులీ దేహంబుల్
  మూసిందేఁటిది మూఁతలేఁటివి సదా మూఢత్వమే కాని తాఁ
  జేసిందేఁటిది చేఁతలేఁటివి వృథా శ్రీకాళహస్తీశ్వరా !  - Added By Chary
  
  
• రోసీరోయదు కామినీజనుల తారుణ్యోరు సౌఖ్యంబులన్,
  పాసీపాయదు పుత్రమిత్రజన సంపద్భ్రాంతి, వాంఛాలతల్
  కోసీకోయదు నామనం బకట ! నీకున్ ప్రీతిగా సత్క్రియల్
  చేసీచేయదు, దీనిత్రుళ్ళణపవే ! శ్రీకాళహస్తీశ్వరా !!  - Added By Dsubrahmanyam
  
  

ల (1)     Add New Padyam      

---

• లేవో కానలఁ గందమూలఫలముల్, లేవో గుహ ల్తోయముల్
  లేవో యేఱుల పల్లవాస్తరణముల్, లేవో సదాయాత్మలో
  లేవో నీవు విరక్తులన్మనుప, జాలింబొంది, భూపాలురన్
  సేవల్సేయగ బోదురేలొకొ జనుల్ శ్రీకాళహస్తీశ్వరా !!  - Added By Dsubrahmanyam
  
  

వ (6)     Add New Padyam      

---

• వన్నే యేనుగుతోలు దుప్పటము, బువ్వాకాలకూటంబు, చే
  గిన్నే బ్రహ్మకపాల ముగ్రమగు భోగే కంఠహారంబు, మే
  ల్నిన్నీలాగున నుండియుం తెలిసియు న్నీ పాదపద్మంబు చే
  ర్చెన్నారాయణుడెట్లు మానసముఁ దా శ్రీకాళహస్తీశ్వరా !!  - Added By Dsubrahmanyam
  
  
• వాణీవల్లభ దుర్లభంబగు భవద్ద్వారంబు నన్నిల్చి, ని
  ర్వాణశ్రీఁ జెఱపట్ట చూచిన విచారద్రోహమో, నిత్య క
  ల్యాణక్రీడలఁబాసి, దుర్దశలపాలై, రాజలోకాధమ
  శ్రేణీద్వారము దూరఁ జేసి దిపుడో శ్రీకాళహస్తీశ్వరా !  - Added By Dsubrahmanyam
  
  
• విత్తజ్ఞానము పాడుచిత్తము, భవావేశంబు రక్షాంబువుల్
  మత్తత్త్వంబు తదంకురం బనృతముల్, మారాకులత్యంత దు
  ర్వృత్తుల్ పువ్వులు పండ్లు మన్మథ ముఖావిర్భూత దోషంబులుం
  జిత్తాభ్యున్నత నింబ భూజమునకున్, శ్రీకాళహస్తీశ్వరా !!  - Added By Dsubrahmanyam
  
  
• వీడెంబబ్బినయప్పుడున్ దమస్తుతుల్ విన్నప్పుడుం బొట్టలో
  కూడున్నప్పుడు శ్రీవిలాసములుపైకొన్నప్పుడున్ గాయకుల్
  పాడంగా వినునప్పుడున్ జెలగు ధంభప్రాయువిశ్రాణన
  క్రీడాసక్తుల నేమి చెప్పవలెనో శ్రీకాళహస్తీశ్వరా !!  - Added By Dsubrahmanyam
  
  
• వెనుకం జేసిన ఘోరదుర్దశలు భావింపంగ రోఁతయ్యెడున్
  వెనుకన్ముందటవచ్చు దుర్మరణము ల్వీక్షింప భీతయ్యెడున్
  నను నేఁ జూచియు నా విధుల్దలచియు న్నాకే భయంబయ్యెడుం
  జెనకుంజీకటినాయెఁ గాలమునకున్ శ్రీకాళహస్తీశ్వరా !!  - Added By Dsubrahmanyam
  
  
• వేధం దిట్టగరాదు గాని భువిలో విద్వాంసులం జేయనే
  లా ధీచాతురిఁ జేసిఁ జేసిన గులామాపాటునే పోక క్షు
  ద్బాధాదుల్ కలిగింపనేల యదికృత్యంబైన దుర్మార్గులం
  ఛీ ! ధాత్రీశులఁ జేయనేటి కకటా ! శ్రీకాళహస్తీశ్వరా !!  - Added By Dsubrahmanyam
  
  

శ (4)     Add New Padyam      

---

• శుకము ల్కింశుకపుష్పము ల్గని ఫలస్తోమంబటంచు న్సము
  త్సుకతం జేరగబోవ నచ్చట మహాదుఃఖంబు సిద్ధించుఁ గ
  ర్మ కళాభాషలకెల్ల ప్రాపులగు శాస్త్రంబు ల్విలోకించువా
  రికి నిత్యత్వమనీష దూరమగునో శ్రీకాళహస్తీశ్వరా !!  - Added By Dsubrahmanyam
  
  
• శ్రీ విద్యుత్కలితాజవంజవ మహా జీమూత పాపాంబు ధా
  రా వేగంబున మన్మనోజ్జ సముదీర్ణత్వంబు గోల్పోయితిన్
  దేవా ! మీ కరుణా శరత్సమయ మింతేఁ జాలు, సద్భావనా
  సేవం దామరతంపరై మనియెదన్ శ్రీకాళహస్తీశ్వరా !  - Added By Dsubrahmanyam
  
  
• శ్రీశైలేశు భజింతునో, యభవుఁ గాంచీనాథు సేవింతునో
  కాశీవల్లభుఁ గొల్వబోదునొ, మహిన్ కాళేశుఁ బూజింతునో
  నా శీలంబణువైన మేరువనుచున్ రక్షింపవే, నీ కృపా
  శ్రీ శృంగార విలాసహాసములచే శ్రీకాళహస్తీశ్వరా !!  - Added By Dsubrahmanyam
  
  
• శ్రుతులభ్యాసముచేసి శాస్త్రగరిమల్శోధించి తత్త్వంబులన్
  మతినూహించి, శరీరమస్థిరము, బ్రహ్మంబన్న, సత్యంబు గాం
  చితిమంచున్ సభలన్ వృథావచనము ల్చెప్పంగనే కాని, ని
  ర్జిత చిత్తస్థిరసౌఖ్యముల్ తెలియరో శ్రీకాళహస్తీశ్వరా !!  - Added By Dsubrahmanyam
  
  

ష (0)     Add New Padyam      

---

స (6)     Add New Padyam      

---

• సంతోషించితి చాలు చాలు రతిరాజద్వార సౌఖ్యంబులన్
  శాంతిన్ బొందితి చాలు చాలు బహురాజద్వార సౌఖ్యంబులన్
  శాంతిం బొందెద జూపు బ్రహ్మపద రాజద్వార సౌఖ్యంబు ని
  శ్చింతన్ శాంతుడనౌదు నీ కరుణచే శ్రీకాళహస్తీశ్వరా !!  - Added By Dsubrahmanyam
  
  
• సంపద్గర్వముఁ బారద్రోలి, రిపులన్ జంకించి, యాకాంక్షలన్
  దంపుల్వెట్టి, కళంకముల్నఱికి, బంధక్లేశ దోషంబులన్
  జింపుల్చేసి, వయోవిలాసములు సంక్షేపించి, భూతంబులన్
  జెంపల్వేయక నిన్నుఁ గాననగునా ? శ్రీకాళహస్తీశ్వరా !!  - Added By Dsubrahmanyam
  
  
• సలిలమ్ము ల్చిలుకప్రమాణ మొక పుష్పమ్ము న్భవన్మౌళి ని
  శ్చలభక్తి ప్రతిపత్తిచే నరుడు పూజన్సేయగా ధన్యుడౌ
  నిల గంగాజల చంద్రఖండముల దా నిందుం దుదింగాంచు నీ
  చెలువంబంతయు నీ మాహత్త్యమిదిగా శ్రీకాళహస్తీశ్వరా !!  - Added By Dsubrahmanyam
  
  
• సులభుల్మూర్ఖు లనుత్తమోత్తములు రాజుల్గల్గి యేవేళన
  న్నలఁతం బెట్టిన నీ పదాబ్జములఁ బాయంజాల నేమిచ్చినం
  గలధౌతాచల మేలుటంబునిధిలోఁ గాపుండుటబ్జంబుపైఁ
  జెలువొప్పన్సుఖియింపఁ గాంచుటసుమీ శ్రీకాళహస్తీశ్వరా !  - Added By Chary
  
  
• స్తోత్రంబన్యులఁ జేయనొల్లని వ్రతస్థుల్వోలె వేసంబుతోఁ
  బుత్త్రీపుత్త్ర కళత్రరక్షణ కళాబుద్ధిన్ నృపాలాధమున్
  బాత్రంబంచు భజింపఁబోదు రిదియు న్బావ్యంబె యెవ్వారి చా
  రిత్రంబెన్నఁడు మెచ్చనెంత మదిలో శ్రీకాళహస్తీశ్వరా !  - Added By Chary
  
  
• స్వామిద్రోహముచేసి, వేరొకని కొల్వన్ బోతినో, కాక నే
  నీమాటల్విన నొల్ల కుండితినో, నిన్నే దిక్కుగా జూడనో ?
  యేమీ యిట్టి వృథాపరాధియగు నన్నీ దుఃఖవారాశి వీ
  చీమధ్యంబున ముంచి యుంపఁదగునా ? శ్రీకాళహస్తీశ్వరా !  - Added By Dsubrahmanyam
  
  

హ (0)     Add New Padyam      

---

ళ (0)     Add New Padyam      

---

క్ష (2)     Add New Padyam      

---

• క్షితినాథోత్తమ ! సత్కవీశ్వరుఁడు వచ్చెన్ మిమ్ములంజూడఁగా
  నతఁడే మేటి కవిత్వవైఖరిని ? సద్యఃకావ్యవిర్మాత త
  త్ప్రతిభ ల్మంచివి తిట్టుపద్యములు చెప్పండాతఁడైనన్ మముం
  గ్రితమే చూచెను బొమ్మటంచు రధముల్ శ్రీకాళహస్తీశ్వరా !  - Added By Chary
  
  
• క్షితిలో దొడ్డతురంగసామజములే చిత్రమ్ము లాందోళికా
  తతులే లెక్క విలాసినీజన సువస్త్రవ్రాత భూషాకలా
  ప తనూజాదికమేమి దుర్లభము నీ పాదమ్ము లర్చించుచో
  జితపంకేరుహ పాదపద్మయుగళా శ్రీకాళహస్తీశ్వరా !  - Added By Chary
  
  

ఱ (1)     Add New Padyam      

---

• ఱాలన్ ఱువ్వగ చేతులాడవు, కుమారా రమ్మురమ్మంచు నే
  చాలన్ చంపగ, నేత్రము ల్దివియగా శక్తుండ నే గాను, నా
  శీలంబేమని చెప్పనున్న దిక నీ చిత్తంబు, నా భాగ్యమో
  శ్రీలక్ష్మీపతి సేవితాంఘ్రియుగళా ! శ్రీకాళహస్తీశ్వరా !!  - Added By Dsubrahmanyam