సుమతీ శతకము - బద్దెన

విషయ సూచిక : అ  ఆ  ఇ  ఈ  ఉ  ఊ  ఋ  ౠ  ఎ  ఏ  ఐ  ఒ  ఓ  ఔ  అం  అః  క  ఖ  గ  ఘ  ఙ  చ  ఛ  జ  ఝ  ఞ  ట  ఠ  డ  ఢ  ణ  త  థ  ద  ధ  న  ప  ఫ  బ  భ  మ  య  ర  ల  వ  శ  ష  స  హ  ళ  క్ష  ఱ 

అ (7)     Add New Padyam      

---

• అక్కఱకురాని చుట్టము
  మ్రొక్కిన వరమీని వేల్పు మోహరమునఁ దా
  నెక్కినఁ బాఱని గుఱ్ఱము
  గ్రక్కున విడువంగవలయుఁ గదరా సుమతీ!  - Added By Kvbsastri
  
  
• అడిగిన జీతం బియ్యని
  మిడిమేలపు దొరను గొల్చి మిడుకుట కంటెన్
  వడిగల యెద్దులఁ గట్టుక
  మడి దున్నుక బ్రతక వచ్చు మహిలో సుమతీ!  - Added By Raga
  
  
• అడియాస కొలువుఁ గొలవకు
  గుడిమణియము సేయఁబోకు , కుజనులతోడన్
  విడువక కూరిమి సేయకు
  మడవినిఁ దోడరయ కొంటి నరుగకు సుమతీ !  - Added By Raga
  
  
• అధరము గదలియుఁ గదలక
  మధురములగు భాషలుడిగి మౌనవ్రతుఁడౌ
  నధికార రోగపూరిత
  బధిరాంధక శవముఁ జూడఁ బాపము సుమతీ !  - Added By Raga
  
  
• అప్పిచ్చువాఁడు, వైద్యుఁడు
  నెప్పుడు నెడతెగక పాఱె డేఱును ద్విజుఁడున్
  జొప్పడిన యూర నుండుము
  చొప్పడకున్నట్టి యూరుఁ జొరకుము సుమతీ!  - Added By Sarma
  
  
• అప్పుగొని చేయు విభవము
  ముప్పునఁ బ్రాయంపుటాలు మూర్ఖుని తపమున్
  దప్పరయని నృపరాజ్యము
  దెప్పరమై మీఁదఁ గీడు దెచ్చుర సుమతీ !  - Added By Raga
  
  
• అల్లుని మంచితనంబును
  గొల్లని సాహిత్యవిద్య కోమలి నిజమున్
  బొల్లున దంచిన బియ్యము
  దెల్లని కాకులును లేవు తెలియర సుమతీ!  - Added By Kvbsastri
  
  

ఆ (2)     Add New Padyam      

---

• ఆఁకలి యడుగని కడుపును
  వేఁకటియగు లంజ పడుపు విడువని బ్రతుకున్
  బ్రాఁకొన్న నూతి యుదకము
  మేఁకల పాఁడియును రోఁత మేదిని సుమతీ!  - Added By Kvbsastri
  
  
• ఆఁకొన్న కూడె యమృతము
  తాఁకొండక నిచ్చువాఁడె దాత ధరిత్రిన్
  సోఁకోర్చువాడె మనుజుఁడు
  తేఁకువగలవాఁడె వంశ తిలకుఁడు సుమతీ!  - Added By Kvbsastri
  
  

ఇ (2)     Add New Padyam      

---

• ఇచ్చునదె విద్య, రణమునఁ
  జొచ్చినదే మగతనంబు , సుకవీశ్వరులున్
  మెచ్చునదె నేర్పు , వాదుకు
  వచ్చునదే కీడు సుమ్ము వసుధను సుమతీ!  - Added By Raga
  
  
• ఇమ్ముగఁ జదువని నోరును
  "నమ్మా"యని పిలిచి యన్న మడుగని నోరున్
  దమ్ములఁ బిలువని నోరును
  గుమ్మరి మను ద్రవ్వినట్టి గుంటర సుమతీ !  - Added By Raga
  
  

ఈ (0)     Add New Padyam      

---

ఉ (5)     Add New Padyam      

---

• ఉడుముండదె నూఱేండ్లును
  బడియుండదె పేర్మిఁ బాము పదినూఱేండ్లున్
  మడువునఁ గొక్కెర యుండదె
  కడు నిలఁబురుషార్ధపరుఁడు గావలె సుమతీ !  - Added By Raga
  
  
• ఉత్తమ గుణములు నీచున
  కెత్తెఱఁగున గలుగనేర్చు నెయ్యెడలం దా
  నెత్తిచ్చి కఱగిపోసిన
  నిత్తడి బంగార మగునె యిలలో సుమతీ !  - Added By Raga
  
  
• ఉదకము ద్రావెడు హయమును
  మదమున నుప్పొంగుచుండు మత్తేభంబున్
  మొదవు కడనున్న వృషభముఁ
  జదువని యా నీచుఁ జేరఁ జనకుర సుమతీ !  - Added By Raga
  
  
• ఉపకారికి నుపకారము
  విపరీతము గాదు సేయ వివరింపంగా
  నపకారికి నుపకారము
  నెపమెన్నక సేయువాడు నేర్పరి సుమతీ!  - Added By Yamakinkarudu
  
  
• ఉపమింప మొదలు తియ్యన
  కపటం బెడనెడను జెఱుకు కైవడినే పో
  నెపములు వెదకును గడపటఁ
  గపటపు దుర్జాతిపొందు గదరా సుమతీ !  - Added By Raga
  
  

ఊ (0)     Add New Padyam      

---

ఋ (0)     Add New Padyam      

---

ౠ (0)     Add New Padyam      

---

ఎ (3)     Add New Padyam      

---

• ఎప్పటి కెయ్యది ప్రస్తుత
  మప్పటికా మాటలాడి యన్యుల మనముల్
  నొప్పింపక తానొవ్వక
  తప్పించుకు తిరుగు వాడు ధన్యుడు సుమతీ !  - Added By Indian
  
  
• ఎప్పుడు దప్పులు వెదికెడు
  నప్పురుషుని కొల్వగూడ దదియెట్లన్నన్
  సప్పంబు పడగ నీడను
  గప్పవసించిన విధంబు గదరా సుమతీ !  - Added By Indian
  
  
• ఎప్పుడు సంపదకల్గిన
  నప్పుడె బంధువులువత్తురది యెట్లన్నన్
  దెప్పలుగఁ జెరువు నిండినఁ
  గప్పలు పదివేలుచేరుఁ గదరా సుమతీ!  - Added By Sarma
  
  

ఏ (1)     Add New Padyam      

---

• ఏఱకుమీ కసుగాయలు
  దూఱకుమీ బంధుజనుల దోషము సుమ్మీ
  పాఱకుమీ రణమందున
  మీఱకుమీ గురువులాజ్ఞ మేదిని సుమతీ !  - Added By Raga
  
  

ఐ (0)     Add New Padyam      

---

ఒ (2)     Add New Padyam      

---

• ఒకయూరికి నొక కరణము
  నొక తీర్పరియైనఁ గాక నొగిఁ దఱచైనన్
  గకవికలు గాక యుండునె
  సకలంబును గొట్టువడక సహజము సుమతీ !  - Added By Raga
  
  
• ఒల్లని సతి నొల్లని పతి
  నొల్లని చెలికాని విడువ నొల్లనివాఁడే
  గొల్లండు గాక ధరలో
  గొల్లండును గొల్లఁడౌనె గుణమున సుమతీ !  - Added By Raga
  
  

ఓ (1)     Add New Padyam      

---

• ఓడల బండ్లును వచ్చును
  ఓడలు నా బండ్లమీఁద నొప్పుగ వచ్చున్
  ఓడలు బండ్లును వలెనే
  వాడంబడుఁగలిమిలేమి వసుధను సుమతీ !  - Added By Raga
  
  

ఔ (0)     Add New Padyam      

---

అం (0)     Add New Padyam      

---

అః (0)     Add New Padyam      

---

క (19)     Add New Padyam      

---

• కడు బలవంతుండైనను
  బుడమినిఁ బ్రాయంపుటాలిఁ బుట్టినయింటిన్
  దడ వుండనిచ్చె నేనియుఁ
  బడుపుగ నంగడికిఁ దానె పంపుట సుమతీ !  - Added By Raga
  
  
• కనకపు సింహాసమున
  శునకముఁ గూర్చుండఁ బెట్టి శుభలగ్నమునం
  దొనరఁగఁ బట్టము గట్టిన
  వెనుకటి గుణమేల మాను వినరా సుమతీ!  - Added By Yamakinkarudu
  
  
• కప్పకు నొరగాలైనను
  సప్పమునకు రోగమైన సతి తులువైనన్
  ముప్పున దరిద్రుఁడైనను
  దప్పదు మఱి దుఃఖమగుట తథ్యము సుమతీ!  - Added By Amerindian_rvc
  
  
• కమలములు నీటబాసిన
  కమలాప్తుని రశ్మి సోకి కమలిన భంగిన్
  తమతమ నెలవులు తప్పిన
  తమ మిత్రులె శత్రులగుట తధ్యము సుమతీ!  - Added By Sarma
  
  
• కరణము సాధై యున్నను
  గరి మదముడిఁగినను బాము గఱవకయున్నన్
  ధరఁ దేలు మీటకున్నను
  గర మరుదుగ లెక్కఁగొనరు గదరా సుమతీ!  - Added By Amerindian_rvc
  
  
• కరణముఁ గరణము నమ్మిన
  మరణాంతకమౌను గాని మనలేఁడు సుమీ
  కరణము దన సరి కరణము
  మఱి నమ్మక మర్మమీక మనవలె సుమతీ!  - Added By Amerindian_rvc
  
  
• కరణముల ననుసరింపక
  విరసంబునఁ దిన్నతిండి వికటించుఁ జుమీ
  యిరుసునఁ గందెనఁ బెట్టక
  పరమేశ్వరు బండియైనఁ బాఱదు సుమతీ!  - Added By Amerindian_rvc
  
  
• కవిగాని వాని వ్రాఁతయు
  నవరస భావములు లేని నాతుల వలపున్
  దవిలి చను పంది నేయని
  వివిధాయుధ కౌశలంబు వృథరా సుమతీ !  - Added By Raga
  
  
• కసుగాయఁ గఱచి చూచిన
  మసలక దనయొగరు గాక మధురంబగునా?
  పసగలుగు యువతు లుండగఁ
  బసిబాలలఁ బొందువాఁడు పసరము సుమతీ!  - Added By Amerindian_rvc
  
  
• కాదన్నవాడె కరణము
  వాదడచినవాడె పేడి వసుధేశుకడన్
  లేదన్నవాడె చనవరి
  గాథలు పెక్కాడువాడె కావ్యుడు సుమతీ!  - Added By Chaduvu
  
  
• కాదుసుమీ దుస్సంగతి
  పోదుసుమీ కీర్తికాంత పొందిన పిదపన్
  వాదుసుమీ యప్పిచ్చుట
  లేదుసుమీ సతులవలపు లేశము సుమతీ !  - Added By Raga
  
  
• కాముకుఁడు దనిసి విడిచిన
  కోమలిఁ బరవిటుఁడు గవయ గూడుటయెల్లన్
  బ్రేమమునఁ జెఱకుపిప్పికి
  జీమలు వెస మూఁగినట్లు సిద్ధము సుమతీ!  - Added By Amerindian_rvc
  
  
• కారణములేని నగవును
  బేరణమును లేని లేమ పృథివీస్థలిలోఁ
  బూరణములేని బూరెయు
  వీరణమునులేని పెండ్లి వృథరా సుమతీ !  - Added By Raga
  
  
• కులకాంత తోడనెప్పుడు
  గలహింపకు వట్టి తప్పు ఘటియింపకుమీ
  కలకంఠి కంట కన్నీ
  రొలికిన సిరి యింటినుండ నొల్లదు సుమతీ !  - Added By Indian
  
  
• కూరిమిగల దినములలో
  నేరములెన్నడును గలుగ నేరవు మఱి యా
  కూరిమి విరసంబైనను
  నేరములే తోచుచుండు నిక్కము సుమతీ !  - Added By Indian
  
  
• కొంచెపు నరు సంగతిచే
  నంచితముగఁ గీడు వచ్చు నది యెట్లన్నన్
  గించిత్తు నల్లి కుట్టిన
  మంచమునకుఁ జేటువచ్చు మహిలో సుమతీ!  - Added By Amerindian_rvc
  
  
• కొక్కోకమెల్లఁ జదివినఁ
  జక్కనివాఁడైన రాజు చంద్రుండైనన్
  మిక్కిలి రొక్కంబీయక
  చిక్కదురా వారకాంత సిద్ధము సుమతీ!  - Added By Amerindian_rvc
  
  
• కొఱగాని కొడుకు పుట్టినఁ
  గొఱగామియెకాదు తండ్రి గుణములఁ జెరచున్
  జెఱకు తుద వెన్ను పుట్టిన
  జెఱకునఁ దీపెల్లఁ జెఱచు సిద్ధము సుమతీ!  - Added By Sarma
  
  
• కోమలి విశ్వాసంబును
  బాములతోఁ జెలిమి యన్య భామలవలపున్
  వేముల తియ్యఁదనంబును
  భూమీశుల నమ్మికలును బొంకుర సుమతీ !  - Added By Raga
  
  

ఖ (0)     Add New Padyam      

---

గ (1)     Add New Padyam      

---

• గడనగల మగనిఁ జూచిన
  నడుగడుగున మడుఁగులిడుదు రతివలు తమలో
  గడ నుడుగు మగనిఁ జూచిన
  నడపీనుఁగ వచ్చెననుచు నగుదురు సుమతీ !  - Added By Raga
  
  

ఘ (0)     Add New Padyam      

---

ఙ (0)     Add New Padyam      

---

చ (4)     Add New Padyam      

---

• చింతింపకు గడచినపని
  కింతులు వలతురని నమ్మకెంతయు మదిలో
  నంతఃపుర కాంతలతో
  మంతనములు మాను మిదియె మతముర సుమతీ !  - Added By Raga
  
  
• చీమలు పెట్టిన పుట్టలు
  పాముల కిరవైన యట్లు పామరుడు దగన్
  హేమంబు కూడబెట్టిన
  భూమీశుల పాలజేరు భువిలో సుమతీ!  - Added By Yamakinkarudu
  
  
• చుట్టములు గాని వారలు
  చుట్టములము నీకటంచు సొంపుదలిర్పన్
  నెట్టుకొని యాశ్రయింతురు
  గట్టిగఁద్రవ్యంబు గలుగఁగదరా సుమతీ !  - Added By Raga
  
  
• చేతులకుఁదొడవు దానము
  భూతలనాథులకుఁదొడవు బొంకమి ధరలో
  నీతియ తొడ వెవ్వారికి
  నాతికి మానంబు తొడవు నయముగ సుమతీ !  - Added By Raga
  
  

ఛ (0)     Add New Padyam      

---

జ (0)     Add New Padyam      

---

ఝ (0)     Add New Padyam      

---

ఞ (0)     Add New Padyam      

---

ట (0)     Add New Padyam      

---

ఠ (0)     Add New Padyam      

---

డ (0)     Add New Padyam      

---

ఢ (0)     Add New Padyam      

---

ణ (0)     Add New Padyam      

---

త (10)     Add New Padyam      

---

• తడ వోర్వక యొడలోర్వక
  కడువేగం బడచిపడినఁగార్యం బగునే?
  తడవోర్చిన నొడలోర్చినఁ
  జెడిపోయిన కార్యమెల్ల జేకుఱు సుమతీ !  - Added By Raga
  
  
• తన కోపమె తన శత్రువు
  తన శాంతమె తనకు రక్ష, దయ చుట్టంబౌఁ
  దన సంతోషమె స్వర్గము
  తన దఃఖమె నరకమండ్రు, తథ్యము సుమతీ!  - Added By Yamakinkarudu
  
  
• తనకలిమి యింద్రభోగము
  తనలేమియె సర్వలోక దారిద్ర్యంబున్
  తనచావు జగత్ ప్రళయము
  తను వలచినదియె రంభ తథ్యము సుమతీ !  - Added By Indian
  
  
• తనయూరి తపసితనమును
  దన పుత్రుని విద్య పెంపుఁ దన సతి రూపున్
  దన పెరటిచెట్టు ముందును
  మనసున వర్ణింప రెట్టి మనుజులు సుమతీ !  - Added By Raga
  
  
• తనవారు లేని చోటను
  జనమించుక లేనిచోట జగడము చోటన్
  అనుమానమైన చోటను
  మనుజునకును నిలువఁదగదు మహిలో సుమతీ !  - Added By Raga
  
  
• తములము వేయని నోరును
  విమతులతో జెలిమి సేసి వెతఁబడు తెలివిన్
  గమలములు లేని కొలఁకును
  హిమధాముఁడు లేని రాత్రి హీనము సుమతీ !  - Added By Raga
  
  
• తలనుండు విషము ఫణికిని
  వెలయంగా తోకనుండు వృశ్చికమునకున్
  తలతోఁక యనక యుండును
  ఖలునకు నిలువెల్ల విషము కదరా సుమతీ!  - Added By Sarma
  
  
• తలపొడుగు ధనముఁబోసిన
  వెలయాలికి నిజములేదు వివరింపంగాఁ
  దల దడివి బాసఁ జేసిన
  వెలయాలిని నమ్మరాదు వినరా సుమతీ !  - Added By Raga
  
  
• తలమాసిన నొలుమాసిన
  వలువలు మాసినను బ్రాణవల్లభునైనన్
  గులకాంతలైన రోఁతురు
  తిలకింపఁగ భూమిలోనఁ దిరముగ సుమతీ!  - Added By Amerindian_rvc
  
  
• తాననుభవింప నర్థము
  మానవపతిఁ జేరుఁ గొంత మఱి భూగతమౌఁ
  గానల నీఁగలు గూర్చిన
  తేనియ యొరుఁజేరినట్లు తిరముగ సుమతీ!  - Added By Amerindian_rvc
  
  

థ (0)     Add New Padyam      

---

ద (1)     Add New Padyam      

---

• దగ్గర కొండెము చెప్పెడు
  ప్రెగ్గడ పలుకులకు రాజు ప్రియుఁడై మఱి తా
  నెగ్గుఁ బ్రజ కాచరించుట
  బొగ్గులకై కల్పతరువుఁ బొడుచుట సుమతీ!  - Added By Amerindian_rvc
  
  

ధ (2)     Add New Padyam      

---

• ధనపతి సఖుడై యుండియు
  నెనయంగా శివుడు భిక్షమెత్తగ వలసెన్
  దనవారి కెంత కలగిన
  దన భాగ్యమె తనకుగాక తథ్యము సుమతీ !  - Added By Indian
  
  
• ధీరులకుఁ జేయు మేలది
  సారంబగు నారికేళ సలిలము భంగిన్
  గౌరవమును మఱి మీఁదట
  భూరి సుఖావహము నగును భువిలో సుమతీ!  - Added By Amerindian_rvc
  
  

న (7)     Add New Padyam      

---

• నడువకుమీ తెరువొక్కట
  కుడువకుమీ శత్రునింట కూరిమితోడన్
  ముడువకుమీ పరధనముల
  నుడువకుమీ యొరుల మనసు నొవ్వగ సుమతీ!  - Added By Sarma
  
  
• నమ్మకు సుంకరిఁ జూదరిఁ
  నమ్మకు మగసాలివాని నటు వెలయాలిన్
  నమ్మకు మంగడివానిని
  నమ్మకుమీ వాహహస్తు నవనిని సుమతీ!  - Added By Amerindian_rvc
  
  
• నయమునఁ బాలుం ద్రావరు
  భయమ్మున విషమ్మునైన భక్షింతురుగా
  నయమెంత దోసకారియొ
  భయమే చూపంగ వలయు బాగుగ సుమతీ!  - Added By Amerindian_rvc
  
  
• నరపతులు మేరఁ దప్పినఁ
  దిర మొప్పగ విధవ యింటఁ దీర్పరియైనన్
  గరణము వైదికుఁడయినను
  మరణాంతకమౌను గాని మానదు సుమతీ!  - Added By Amerindian_rvc
  
  
• నవరస భావాలంకృత
  కవితా గోష్ఠియును మధుర గానంబును దా
  నవివేకి కెంతఁ జెప్పినఁ
  జెవిటికి సంకూదినట్లు సిద్ధము సుమతీ!  - Added By Amerindian_rvc
  
  
• నవ్వకుమీ సభ లోపల
  నవ్వకుమీ తల్లిదండ్రి నాథుల తోడన్
  నవ్వకుమీ పరసతితో
  నవ్వకుమీ విప్రవరుల నయమిది సుమతీ!  - Added By Amerindian_rvc
  
  
• నీరే ప్రాణాధారము
  నోరే రసభరితమైన నుడువులకెల్లన్
  నారియె నరులకు రత్నము
  చీరయె శృంగారమండ్రు సిద్ధము సుమతీ!  - Added By Amerindian_rvc
  
  

ప (19)     Add New Padyam      

---

• పగ వలదెవ్వరి తోడను
  వగవంగా వలదు లేమి వచ్చిన పిదపన్
  దెగనాడవలదు సభలను
  మగువకు మనసీయవలదు మహిలో సుమతీ!  - Added By Amerindian_rvc
  
  
• పతి కడకుఁ దన్ను గూర్చిన
  సతికడకును , వేల్పుకడకు , సద్గురు కడకున్
  సుతు కడకు రిత్తచేతుల
  మతిమంతులు చనరు , నీతి మార్గము సుమతీ !  - Added By Raga
  
  
• పనిచేయు నెడల దాసియు
  ననుభవమున రంభ మంత్రి యాలోచనలన్
  దన భుక్తియెడలఁ దల్లియు
  ననఁ దన కులకాంత యుండ నగురా సుమతీ!  - Added By Amerindian_rvc
  
  
• పరనారీ సోదరుడై
  పరధనముల కాసపడక పరులకు హితుడై
  పరులు దను బొగడ నెగడియు
  పరులలిగిన నలుగ నతడు పరముడు సుమతీ !  - Added By Indian
  
  
• పరసతి కూటమిఁగోరకు ,
  పరధనముల కాసపడకు పరునెంచకుమీ ,
  సరిగాని గోష్ఠి సేయకు,
  సరి చెడిఁ జుట్టుంబుకడకుఁ జేరకు సుమతీ !  - Added By Raga
  
  
• పరసతుల గోష్ఠినుండిన
  పురుషుఁడు గాంగేయుడైన భువి నిందబడున్
  బరసతి సుశీలయైనను
  బరుసంగతి నున్న నింద పాలగు సుమతీ !  - Added By Raga
  
  
• పరు నాత్మఁ దలఁచు సతిఁ విడు
  మఱుమాటలు పలుకు సుతుల మన్నింపకుమీ
  వెఱపెఱుఁగని భటు నేలకు
  తఱచుగ సతిఁ గవయఁబోకు తగదుర సుమతీ!  - Added By Amerindian_rvc
  
  
• పరుల కనిష్టము సెప్పకు
  పొరుగిండ్లకుఁ బనులు లేక పోవకు మెప్పుడున్
  బరుఁ గలిసిన సతి గవయకు
  యెఱిఁగియు బిరుసైన హయము నెక్కకు సుమతీ !  - Added By Raga
  
  
• పర్వముల సతులఁ గవయకు
  ముర్వీశ్వరుకరుణ నమ్మి యుబ్బకు మదిలో ,
  గర్వింప నాలిఁ బెంచకు,
  నిర్వహణము లేనిచోట నిలవకు , సుమతీ !  - Added By Raga
  
  
• పలుదోమి సేయు విడియము
  తలగడిగిన నాఁటి నిద్ర , తరుణులయెడలన్
  పొలయలుక నాఁటి కూటమి,
  వెల యింతని చెప్పరాదు వినురా సుమతీ !  - Added By Raga
  
  
• పాటెఱుగని పతి కొలువును ,
  గూటంబున కెఱుకపడని కోమలి రతియున్,
  బేఁటెత్తజేయు చెలిమియు
  నేటికి నెదురీఁదినట్లు లెన్నగ సుమతీ !  - Added By Raga
  
  
• పాలను గలసిన జలమును
  బాల విధంబుననె యుండుఁ బరికింపంగాఁ
  బాల చవిఁ జెఱచుఁ గావున
  బాలసుఁడగువాని పొందు వలదుర సుమతీ!  - Added By Amerindian_rvc
  
  
• పాలసునకైన యాపద
  జాలింబడి తీర్పఁదగదు సర్వజ్ఞునకున్
  దేలగ్నిఁ బడఁగఁ బట్టిన
  మేలెఱుఁగునె మీటుఁగాక మేదిని సుమతీ!  - Added By Amerindian_rvc
  
  
• పిలువని పనులకుఁ బోవుట
  కలయని సతిరతియుఁరాజు , గానని కొలువుం
  బిలువని పేరంటంబును
  వలవని చెలిమియును జేయవలదుర సుమతీ!  - Added By Raga
  
  
• పుత్రోత్సాహము తండ్రికి
  పుత్రుడు జన్మించినపుడె పుట్టదు, జనులా
  పుత్రుని గనుగొని పొగడగ
  పుత్రోత్సాహంబు నాడు పొందుర సుమతీ !  - Added By Indian
  
  
• పురికిని బ్రాణము కోమటి
  వరికిని బ్రాణంబు నీరు వసుమతిలోనం
  గరికిని బ్రాణము తొండము
  సిరికిని బ్రాణమ్ము మగువ సిద్ధము సుమతీ !  - Added By Raga
  
  
• పులిపాలు తెచ్చి యిచ్చిన
  నలవడఁగా గుండెగోసి యఱచే నిడినన్
  దల పొడుగు ధనముఁ బోసిన
  వెలయాలికిఁ గూర్మి లేదు వినురా సుమతీ!  - Added By Amerindian_rvc
  
  
• పెట్టిన దినములలోపల
  నట్టడవులకైన వచ్చు నానార్థములున్
  బెట్టని దినములఁ గనకపు
  గట్టెక్కిన నేమి లేదు గదరా సుమతీ!  - Added By Amerindian_rvc
  
  
• పొరుగునఁ బగవాఁడుండిన
  నిరవొందఁగ వ్రాఁతగాఁడె యేలికయైనన్
  ధరఁ గాఁపు కొండెమాడినఁ
  గరణాలకు బ్రతుకులేదు గదరా సుమతీ!  - Added By Amerindian_rvc
  
  

ఫ (0)     Add New Padyam      

---

బ (2)     Add New Padyam      

---

• బంగారుఁ గుదువఁ బెట్టకు
  సంగరమునఁ బాఱిపోకు సరసుఁడవైనన్
  నంగడి వెచ్చము లాడకు
  వెంగలితోఁ జెలిమి వలదు వినురా సుమతీ!  - Added By Amerindian_rvc
  
  
• బలవంతుడ నాకేమని
  బలువురతో నిగ్రహించి పలుకుట మేలా?
  బలవంతమైన సర్పము
  చలిచీమల చేతజిక్కి చావదె సుమతీ!  - Added By Yamakinkarudu
  
  

భ (0)     Add New Padyam      

---

మ (6)     Add New Padyam      

---

• మండలపతి సముఖంబున
  మెండైన ప్రధానిలేక మెలఁగుట యెల్లన్
  గొండంత మదపుటేనుఁగు
  తొండము లేకుండినట్లు దోఁచుర సుమతీ!  - Added By Amerindian_rvc
  
  
• మంత్రిగలవాని రాజ్యము
  తంత్రము చెడకుండ నిలచుఁ దఱచుగ ధరలో
  మంత్రివిహీనుని రాజ్యము
  జంత్రపుఁ గీలూడినట్లు జరుగదు సుమతీ!  - Added By Amerindian_rvc
  
  
• మది నొకనిఁ వలచి యుండఁగ
  మదిజెడి యొక క్రూరవిటుడు మానక తిరుగున్
  అది చిలుకఁ బిల్లి పట్టినఁ
  జదువునె యా పంజరమున జగతిని సుమతీ!  - Added By Amerindian_rvc
  
  
• మాటకుఁ బ్రాణము సత్యము
  కోటకుఁ బ్రాణంబు సుభటకోటి ధరిత్రిన్
  బోటికిఁ బ్రాణము మానము
  చీటికిఁ బ్రాణంబు వ్రాలు సిద్ధము సుమతీ!  - Added By Amerindian_rvc
  
  
• మానఘనుఁ డాత్మధృతిఁ జెడి
  హీనుండగువాని నాశ్రయించుట యెల్లన్
  మానెఁడు జలములలోపల
  నేనుఁగు మెయి దాఁచినట్లు యెఱుగుము సుమతీ!  - Added By Amerindian_rvc
  
  
• మేలెంచని మాలిన్యుని
  మాలను నగసాలివాని మంగలి హితుగా
  నేలిన నరపతి రాజ్యము
  నేలఁ గలసిపోవుఁ గాని నెగడదు సుమతీ!  - Added By Amerindian_rvc
  
  

య (0)     Add New Padyam      

---

ర (2)     Add New Padyam      

---

• రాపొమ్మని పిలువని యా
  భూపాలునిఁ గొల్వ భుక్తి ముక్తులు గలవే?
  దీపంబు లేని యింటను
  జేపుణికిళ్ళాడినట్లు సిద్ధము సుమతీ!  - Added By Amerindian_rvc
  
  
• రూపించి పలికి బొంకకు
  ప్రాపగు చుట్టంబు నెగ్గు పలుకకు మదిలోఁ
  గోపించు రాజుఁ గొల్వకు
  పాపపు దేశంబు సొరకు పదిలము సుమతీ!  - Added By Amerindian_rvc
  
  

ల (1)     Add New Padyam      

---

• లావు గలవాని కంటెను
  భావింపఁగ నీతిపరుఁడు బలవంతుండౌ
  గ్రావంబంత గజంబును
  మావటివాఁడెక్కినట్లు మహిలో సుమతీ!  - Added By Amerindian_rvc
  
  

వ (8)     Add New Padyam      

---

• వరి పంట లేని యూరును
  దొరయుండని యూరును తోడు దొరని తెరువున్
  ధరను బతిలేని గృహమును
  నరయంగా రుద్రభూమి యనఁదగు సుమతీ !  - Added By Raga
  
  
• వఱదైన చేను దున్నకు
  కఱవైనను బంధుజనుల కడ కేఁగకుమీ
  పరులకు మర్మము సెప్పకు
  పిఱికికి దళవాయితనముఁ బెట్టకు సుమతీ!  - Added By Amerindian_rvc
  
  
• వలపింత సతికిఁ బుట్టక
  బలిమినిఁ దమకించి విటుడు పైకొనుటెల్లన్
  మలయజము సాన మీదను
  జలముంచక తీసినట్టి చందము సుమతీ!  - Added By Chaduvu
  
  
• వినఁదగు నెవ్వరు సెప్పిన
  వినినంతనె వేగపడక వివరింపఁదగున్
  గని కల్ల నిజముఁ దెలిసిన
  మనుజుఁడెపో నీతిపరుఁడు మహిలో సుమతీ!  - Added By Amerindian_rvc
  
  
• వీడెము వేయని నోరును
  జేడెల యధరామృతంబుఁ జెందని నోరున్
  బాడంగరాని నోరును
  బూడిద కిరవైన పాడు బొందర సుమతీ!  - Added By Amerindian_rvc
  
  
• వెలయాలి వలనఁ గూరిమి
  గలుగదు మఱిఁ గలిగెనేని కడతేరదుగా
  పలువురు నడిచెడు తెరువునఁ
  బులు మొలవదు మొలిచెనేని బొదలదు సుమతీ!  - Added By Amerindian_rvc
  
  
• వెలయాలు సేయు బాసలు
  వెలయఁగ నగసాలిపొందు వెలమల చెలిమిన్
  గలలోనఁ గన్న కలిమియు
  విలసితముగ నమ్మరాదు వినురా సుమతీ!  - Added By Amerindian_rvc
  
  
• వేసరఁపు జాతిగానీ
  వీసముఁ దాఁ జేయనట్టి వెంగలి గానీ
  దాసికొడుకైనఁ గానీ
  కాసులు గలవాడె రాజు గదరా సుమతీ!  - Added By Amerindian_rvc
  
  

శ (2)     Add New Padyam      

---

• శుభముల నొందని చదువును
  నభినయమును రాగరసము నందని పాటల్
  అభిలాష లేని కూటమి
  సభమెచ్చని మాటలెల్లఁ జప్పన సుమతీ!  - Added By Amerindian_rvc
  
  
• శ్రీరాముని దయచేతను
  నారూఢిగ సకల జనులు నౌరా యనగా
  ధారాళమైన నీతులు
  నోరూరగ జవులుపుట్ట నుడివెద సుమతీ!  - Added By Kvbsastri
  
  

ష (0)     Add New Padyam      

---

స (3)     Add New Padyam      

---

• సరసము విరసము కొఱకే
  పరిపూర్ణ సుఖంబు లధిక బాధల కొఱకే
  పెరుగుట విరుగుట కొఱకే
  ధర తగ్గుట హెచ్చు కొఱకె తథ్యము సుమతీ!  - Added By Yamakinkarudu
  
  
• సిరి తాఁ వచ్చిన వచ్చును
  సలలితముగ నారికేళ సలిలము భంగిన్
  సిరి తాఁ బోయిన బోవును
  కరిమ్రింగిన వెలగపండు కరణిని సుమతీ!  - Added By Amerindian_rvc
  
  
• స్త్రీలయెడ వాదులాడకు
  బాలురతోఁ జెలిమి సేసి భాషింపకుమీ
  మేలైన గుణము విడువకు
  యేలినపతి నిందసేయ కెన్నడు సుమతీ!  - Added By Amerindian_rvc
  
  

హ (0)     Add New Padyam      

---

ళ (0)     Add New Padyam      

---

క్ష (0)     Add New Padyam      

---

ఱ (0)     Add New Padyam      

---